Breaking News

MPJ ua ndalon zyrtarëve nga Beogradi të hyjnë në Kosovë për të bërë fushatë

Jetlir Zyberaj, i cili është këshilltar i ministrit të Punëve të Jashtme, Behgjet Pacollit, ka bërë të ditur se Ministria e Punëve të Jashtme e Kosovës ua ka ndalur zyrtarëve nga Beogradi të hyjnë në Kosovë për të bërë fushatë.

Zyberaj, përmes një postimi në Facebook, ka thënë se ky vendim është marrë pas kërcënimeve që po i bëhen komunitetit serb në Kosovë nga ana e Beogradit zyrtar.

Postimi i plotë i Zyberajt:

“Zgjedhjet e 6 Tetorit janë zgjedhje të Republikës së Kosovës dhe të qytetarëve të saj. Zyrtarët e Beogradit nuk mund dhe nuk do të lejohen të bëjnë fushatë zgjedhore në zgjedhjet e Kosovës. E as nuk do të tolerohen kërcënimet kundër komunitetit serb të Kosovës nga Beogradi. Beogradi e di realitetin në Kosovë dhe konform kësaj duhet të sillet, duke respektuar kushtetutën dhe ligjet e Kosovës”, ka shkruar Zyberaj. E hyrja për në Kosovë i është ndaluar edhe zëvendës drejtorit të zyrës për Kosovën në qeverinë serbe, Damjan Joviqit. Joviqi, që shef ka Marko Gjuriqin, me këtë rast ka deklaruar se “represioni dhe dhuna politike ndaj popullit serb dhe ndaj Listës Serbe vazhdon” dhe ato shtohen në intensitet me afrimin e zgjedhjeve në Kosovë.