Breaking News

Fetai: PSP-ja është e vendosur për drejtësi, vazhdojmë me përfaqësimin e lëndëve në gjykatë

Prokurorja speciale Fatime Fetai, sot deklaroi se Prokuroria Speciale Publike (PSP) do të vazhdojë me përfaqësimin e lëndëve në gjykatë, pa marrë parasysh se shefja e tyre Katica Janeva dje është paraburgosur, si e dyshuar në rastin “Haraçi”.

“Ajo që ndodh mund të jetë vetëm tregues se çdonjëri që ka gabuar para ligjit, duhet të përgjigjet, se punët përfundimisht lëvizin në drejtim pozitiv në shtetin tonë dhe se askush nuk është i paprekshëm”.

“Megjithatë nga ana tjetër, përgjegjësia penale e individëve-prokurorë të PSP-ë, nuk mund të jetë arsyetim që të harrohet gjithë krimi që është bërë në shtet në periudhën e fundit dhe ne ta ndalojmë luftën tonë”.

“Ekipi i PSP-së është i vendosur për luftë për drejtësi dhe ne vazhdojmë me atë që është punë e jona – përfaqësimin e lëndëve në gjykatë”, tha Fatime Fetai, para fillimit të seancës së sotme për rastin “Monstra”.

Ndryshe, dje me urdhër të Prokurorisë Publike për Ndjekjen e Krimit të Organizuar dhe Korrupsonit, u arrestua dhe u paraburgos kryeprokurorja e PSP-së Katica Janeva, e cila dyshohet për keqpërdorim të detyrës zyrtare.

Ajo dyshohet se ka përfituar të mira materiale, me qëllim që t’ia lehtësojë procedurën penale afaristit Jordan Kamçev, i akuzuar nga PSP në rastin “Perandoria”./Telegrafi/