Breaking News

Trojka e BE e shqetësuar nga tensionet SHBA-Iran

Franca, Britania dhe Gjermania kanë bërë thirrje për rifillimin e dialogut dhe fundin e përshkallëzimit mbi marrëveshjen bërthamore të Iranit, pas tensioneve të rritura midis Uashingtonit dhe Teheranit.

Të tre vendet evropiane e bënë këtë deklaratë në një prononcim të përbashkët të publikuar të dielën, në përvjetorin e katërt të nënshkrimit të marrëveshjes bërthamore të Iranit. Të tre palët nënshkruese të marrëveshjes historike shprehën shqetësimin se marrëveshja e vitit 2015 mund të shkatërrohet pas sanksioneve të ashpra të vendosura nga Shtetet e Bashkuara dhe nga vendimi i Iranit për të zvogëluar disa nga angazhimet e veta në hakmarrje për tërheqjen e njëanshme të SHBA nga marrëveshja bërthamore. “Ne besojmë se ka ardhur koha për të vepruar me përgjegjësi dhe të kërkojmë një rrugë për të ndaluar përshkallëzimin e tensioneve dhe për të rifilluar dialogun”, tha versioni në gjuhën angleze i deklaratës së publikuar nga Élysée. “Rreziqet janë të tilla që është e nevojshme që të gjitha palët të marrin një pauzë dhe të mendojnë për pasojat e mundshme të veprimeve të tyre”, shtoi deklarata e trojkës europiane. Të tre vendet evropiane gjithashtu theksuan se ata do të vazhdojnë të mbështesin marrëveshjen bërthamore, por thanë se zbatimi i saj “varet nga pajtimi i plotë i Iranit”. Irani kërkon që palët europiane të bëjnë përpjekje të mjaftueshme që Irani të arrijë përfitimet ekonomike që premtohen nga marrëveshja duke punuar për të kompensuar ndikimet negative të sanksioneve amerikane.