Breaking News

Pacolli: Nëse s’marr leje nga Beogradi, s’bëhem si Gjuriq

Zëvendëskryeministri i Kosovës, Behgjet Pacolli, ka thënë se Brukseli i ka bërë atij presion sa i përket ftesës së tij për vizitë zyrtare në zonën e Sanxhakut.

Pacolli ka thënë se ka kërkuar leje nga Beogradi dhe nëse ajo aprovohet nuk do të pranonte mendimin e askujt për ta realizuar këtë vizitë. ”Kam presion nga Brukseli, që mos ta bëjë këtë vizitë. Kemi bërë kërkesë në Beograd, dhe nëse unë kam leje për të hyrë në Serbi, unë do ta bëjë atë, pa marr parasysh se çka thonë të tjerët”, ka deklaruar ai në Klan Kosova. ”Unë shoh në media pak a shumë hidhërimin e disa krerëve në Beograd. Unë nuk kam çka të kërkoj në Sanxhak për provokime”. Pacolli më tej tha se në rast që Beogradi nuk e lejon vizitën e tij në Sanxhak, nuk do bëhej si Marko Gjuriq i cili në mënyrë të jashtëligjshme hyri në Kosovë. ”Jetoj që 40 vjet jashtë Kosovës, e ndjej veten jashtëzakonisht të lirë në udhëtime, e ndjej vetën tejet të lirshëm, por nëse nuk kam leje të hyj në Serbi nuk do të bëhem si Marko Gjuriq të hyj maleve rrugë të cilat nuk i di, unë s’do të shkojë fare nëse s’më lejohet”. ”Do ta respektoja ftesën e homologut tim. Unë nuk do të kisha marr media nga Kosova për të provokuar dikë. Kur ka ardhur Gjuriq ka ardhur në Kosovë, e ka shfaqur para medieve tre gishta ka provokuar. Unë s’do ta provokoja askënd”. ”Do të shkoja në Novi Pazar si person zyrtar e jo si person privat. Si person privat edhe nesër do të shkoja dhe s’kam nevojë fare ta pyes dikë, por jam ftuar si Ministër i Jashtëm”. ”Mesazhi im nuk do të ishte provokues siç ka bërë pala serbe, në këtë rast Marko Gjuriq me ardhjen e tij në Kosovë”. Sanxhaku është një rajon që shtrihet në Serbi e Mal të Zi, e i cili banohet kryesisht me popullatë boshnjake. Deri vonë, në pjesë të ndryshme të kësaj zone kanë jetuar edhe shqiptarët.

Advertisements